नाशिक : मुख्यमंत्री देवेंद्र फडणवीस उद्या नाशिक दौऱ्यावर येणार असून, त्यांच्या हस्ते ठक्कर डोम येथे ‘भक्ती संगम’ कार्यक्रमाचं उद्घाटन होणार आहे. मुख्यमंत्री दौऱ्याच्या पार्श्वभूमीवर नाशिक महापालिका प्रशासन ॲक्शन मोडमध्ये आलं असून, ठक्कर डोम आणि ABB सर्कल परिसरातील रस्त्यांवरील खड्डे बुजवण्याचं काम सुरू करण्यात आलं आहे.
गेल्या काही दिवसांपासून नाशिक शहरातील रस्त्यांवरील खड्ड्यांचा प्रश्न चर्चेत आहे. अनेक प्रमुख रस्त्यांवर खड्डे पडल्याने वाहनचालक आणि नागरिकांना मोठ्या अडचणींचा सामना करावा लागत आहे. पावसामुळे रस्त्यांची अवस्था आणखी खराब झाली असून, खड्ड्यांमुळे अपघाताचा धोका देखील वाढला आहे.
दरम्यान, मुख्यमंत्री देवेंद्र फडणवीस यांच्या नाशिक दौऱ्याची तयारी सुरू झाल्यानंतर ठक्कर डोम परिसरासह मुख्यमंत्री ज्या मार्गावरून जाण्याची शक्यता आहे, त्या परिसरातील रस्त्यांवर महापालिकेकडून डागडुजी आणि खड्डे बुजवण्याची कामं हाती घेण्यात आली आहेत. त्यामुळे दौऱ्याच्या पार्श्वभूमीवर प्रशासनाची लगबग वाढल्याचं चित्र पाहायला मिळत आहे.
ठक्कर डोम येथे होणाऱ्या ‘भक्ती संगम’ कार्यक्रमाला विशेष महत्त्व असून, या कार्यक्रमासाठी मोठ्या संख्येने नागरिक आणि भाविक उपस्थित राहण्याची शक्यता आहे. त्यामुळे परिसरातील वाहतूक व्यवस्था, रस्त्यांची स्थिती आणि नागरिकांच्या सोयी-सुविधांकडे महापालिका प्रशासनाचं लक्ष आहे.
मात्र, मुख्यमंत्र्यांचा दौरा आला कीच रस्त्यांवरील खड्डे बुजवण्याची आठवण प्रशासनाला का होते? असा सवाल आता नागरिकांकडून उपस्थित होण्याची शक्यता आहे. शहरातील सर्व प्रमुख रस्त्यांवरील खड्डे कायमस्वरूपी बुजवून नागरिकांना सुरक्षित आणि चांगले रस्ते मिळावेत, अशी अपेक्षा नाशिककर व्यक्त करत आहेत.
मुख्यमंत्री दौरा संपल्यानंतरही ही कामं केवळ तात्पुरती न राहता शहरातील इतर भागांमध्येही रस्त्यांची योग्य डागडुजी करण्यात यावी, अशी मागणी नागरिकांकडून होत आहे.
नाशिकमध्ये मुख्यमंत्री फडणवीसांचा दौरा आणि त्याआधी महापालिकेची खड्डे बुजवण्याची लगबग सध्या चर्चेचा विषय ठरली आहे.
