बुलढाण्यात लोककलावंतांच्या मानधन योजनेतील निवड प्रक्रियेवरून सवाल उपस्थित करण्यात आला आहे. मानधन योजनेचा लाभ घेण्यासाठी बोगस व्यक्तींनी कलावंत म्हणून अर्ज केल्याचा आरोप बहुजन समाज कलावंत सेवाभावी संस्थेने केला आहे.
मानधन योजनेत पात्र आणि प्रत्यक्ष लोककला सादर करणाऱ्या कलावंतांचीच निवड व्हावी, यासाठी अर्जांची योग्य पद्धतीने पडताळणी करण्याची मागणी संस्थेने केली आहे. केवळ कागदपत्रांच्या आधारे निवड न करता संबंधित अर्जदार प्रत्यक्षात लोककला सादर करतो का, याची खातरजमा करण्यासाठी कला चाचणी घेण्यात यावी, अशी मागणी करण्यात आली आहे.
यासंदर्भात बहुजन समाज कलावंत सेवाभावी संस्थेने बुलढाणा जिल्हाधिकाऱ्यांकडे निवेदन देत निवड प्रक्रियेत पारदर्शकता ठेवण्याची मागणी केली आहे. शासनाच्या मानधन योजनेचा लाभ खऱ्या आणि पात्र लोककलावंतांपर्यंत पोहोचणे आवश्यक असल्याचे संस्थेने म्हटले आहे.
दरम्यान, संस्थेने केलेल्या बोगस अर्जांच्या आरोपांची प्रशासनाकडून पडताळणी होणे बाकी आहे. या प्रकरणात प्रशासनाकडून कोणती भूमिका घेतली जाते आणि मानधन योजनेतील लाभार्थी निवडीसाठी पुढील प्रक्रिया काय राबवली जाते, याकडे आता लोककलावंतांचे लक्ष लागले आहे.
