नागपुरात लग्नाचे आमिष दाखवून आर्थिक फसवणूक केल्याचा आरोप असलेल्या कथित 'लुटेरी दुल्हन' प्रकरणाचा पोलिसांनी उलगडा केला आहे. या प्रकरणातील मुख्य आरोपी राणी उर्फ कोमल पांडे हिला अटक करण्यात आली असून न्यायालयाने तिला पाच दिवसांची पोलीस कोठडी सुनावली आहे.
पोलिसांनी दिलेल्या माहितीनुसार, गुजरातमधील आकाश जिंदल पारेख हा विवाहासाठी वधूच्या शोधात असताना त्याचा संपर्क राणी उर्फ कोमल पांडे हिच्याशी झाला. तिने स्वतःची ओळख नम्रता मालवीयची बहीण म्हणून करून दिली. त्यानंतर आकाशची नम्रताशी भेट घडवून आणण्यात आली.
तक्रारीनुसार, लग्नाच्या खर्चाच्या नावाखाली त्याच्याकडून ७० हजार रुपये तसेच सोन्या-चांदीचे दागिने घेण्यात आले. सीताबर्डी येथील मंदिरात विवाहाची तयारी सुरू असताना एका व्यक्तीने संबंधित महिला ही स्वतःची पत्नी असल्याचा दावा केला. त्यानंतर फसवणुकीचा संशय आल्याने आकाशने पोलिसांकडे तक्रार दाखल केली.
तपासादरम्यान राणी उर्फ कोमल पांडे हिचा यापूर्वीही अशाच प्रकारच्या आर्थिक फसवणुकीच्या गुन्ह्यांशी संबंध असल्याची माहिती समोर आली आहे. या प्रकरणातील इतर संशयितांचा शोध सुरू असून पोलिसांकडून पुढील तपास केला जात आहे.
पोलिसांनी विवाहाच्या नावाखाली होणाऱ्या आर्थिक व्यवहारांबाबत नागरिकांनी आवश्यक पडताळणी करावी आणि संशयास्पद बाबी आढळल्यास तातडीने पोलिसांशी संपर्क साधावा, असे आवाहन केले आहे.
