नाशिक जिल्ह्यात यंदाच्या पावसाचे असमान चित्र समोर आले आहे. २४ जुलैपर्यंत जिल्ह्यात सरासरीच्या ३९.७ टक्के म्हणजे ९३३.८ मिमी पावसाची नोंद झाली आहे. मात्र तालुकानिहाय पर्जन्यमानात मोठी तफावत दिसून येत असून, त्र्यंबकेश्वरमध्ये सर्वाधिक तर मालेगाव आणि येवला तालुक्यात सर्वात कमी पाऊस झाला आहे.
उपलब्ध आकडेवारीनुसार, त्र्यंबकेश्वर तालुक्यात तब्बल १,४०९.३ मिमी पावसाची नोंद झाली असून तो जिल्ह्यात अव्वल ठरला आहे. याशिवाय पेठ, नाशिक आणि इगतपुरी तालुक्यांमध्येही चांगला पाऊस झाल्याने धरणे आणि जलस्रोतांच्या पाणीपातळीत वाढ होत आहे.
दुसरीकडे, मालेगाव तालुक्यात केवळ १७९.५ मिमी, तर येवला तालुक्यात १७३ मिमी पावसाची नोंद झाली आहे. त्यामुळे या भागातील शेतकरी अजूनही समाधानकारक पावसाच्या प्रतीक्षेत असून खरीप पिकांबाबत चिंता कायम आहे.
जिल्ह्यातील पर्जन्यमानातील ही मोठी तफावत कृषी, जलसाठे आणि सिंचन व्यवस्थेवरही परिणाम करणारी ठरत आहे. आगामी काळात होणाऱ्या पावसाकडे शेतकरी आणि प्रशासनाचे लक्ष लागले आहे.
