आयुक्तांचं चॅलेंज स्वीकारलं; IAS अधिकाऱ्यांना हे शोभत नाही, केशव पोरजेंचा थेट टोला
नाशिक महापालिका प्रशासन आणि राजकीय पदाधिकाऱ्यांमधील वाद आणखी तीव्र होण्याची शक्यता निर्माण झाली आहे. महापालिका आयुक्तांनी दिलेलं चॅलेंज आम्ही स्वीकारलं असून, आयुक्तांच्या कारभारातील चुका दाखवून देऊ, असा थेट इशारा ठाकरे गटाचे महापालिका गटनेते केशव पोरजे यांनी दिला आहे.
महापालिका आयुक्तांच्या भूमिकेवर टीका करताना केशव पोरजे यांनी, “चॅलेंज देणं हे राजकारण्यांचं काम आहे, IAS अधिकाऱ्यांना ते शोभत नाही,” असा थेट टोला लगावला. आयुक्तांनी प्रशासनाच्या चौकटीत राहून काम करावे, असा अप्रत्यक्ष संदेशही त्यांच्या वक्तव्यातून देण्यात आला आहे.
पोरजे यांनी केवळ आयुक्तांच्या चॅलेंजला उत्तर दिलं नाही, तर त्यांच्या कारभारातील चुका महासभेत उघड करण्याचा इशाराही दिला आहे. “आयुक्तांच्या चुका दाखवून देऊ आणि महासभेत त्यांचं नामकरण-बारसं करू,” अशा शब्दांत त्यांनी प्रशासनावर निशाणा साधला.
या वक्तव्यामुळे आता महापालिका प्रशासन आणि राजकीय पदाधिकाऱ्यांमधील मतभेद पुन्हा एकदा चर्चेत आले आहेत. आयुक्तांनी दिलेल्या चॅलेंजची पार्श्वभूमी काय, प्रशासनाच्या कोणत्या निर्णयांवर ठाकरे गटाचा आक्षेप आहे आणि आगामी महासभेत हा मुद्दा किती आक्रमकपणे मांडला जाणार, याकडे आता लक्ष लागलं आहे.
नाशिक महापालिकेतील प्रशासन आणि राजकारणातील संघर्षाचा हा वाद पुढील काही दिवसांत आणखी तापण्याची शक्यता असून, केशव पोरजे यांच्या या वक्तव्यावर महापालिका प्रशासनाकडून काय भूमिका घेतली जाते, हेही महत्त्वाचं ठरणार आहे.
या संपूर्ण मुद्द्यावर आमचे प्रतिनिधी विठ्ठल भाडमुखे यांनी केशव पोरजे यांच्याशी खास बातचीत केली आहे. या संवादातून त्यांनी नेमकी कोणती भूमिका मांडली आणि आयुक्तांना कोणता इशारा दिला, हे पाहणं महत्त्वाचं ठरणार आहे.
आपलं नाशिक | आपला आवाज
