नियमित योगाभ्यासाची सवय लावण्यासाठी 21 दिवसांच्या योगवर्गाची सुरुवात करण्यात आली आहे. या योगमालिकेत दररोज विविध योगासने, पूरक हालचाली, प्राणायाम, ध्यान आणि आरोग्यदायी सवयींचा अभ्यास करून शरीर आणि मन निरोगी ठेवण्याचा प्रयत्न केला जाणार आहे.
योग म्हणजे केवळ आसन आणि प्राणायाम नसून, शारीरिक आणि मानसिक संतुलन साधण्यासाठी आवश्यक असलेल्या विविध अंगांचा समावेश असलेला अभ्यास आहे. या योगाभ्यासात यम, नियम, आसन, प्राणायाम आणि दैनंदिन जीवनातील आहार-विहाराच्या सवयींकडेही लक्ष दिले जाणार आहे.
या भागात योगाभ्यासाची सुरुवात प्रार्थना आणि ओंकाराने करण्यात आली. त्यानंतर शरीर योगासाठी तयार करण्यासाठी विविध पूरक हालचालींचा सराव करण्यात आला. पुढे एकपाद उत्तानपादासन, द्विपाद उत्तानपादासन, पद्मासनातील योगमुद्रा आणि ताडासन यांसारख्या आसनांचा अभ्यास करण्यात आला. तसेच श्वासावर लक्ष केंद्रित करत दीर्घ श्वसन आणि प्राणायामाची पूर्वतयारीही करण्यात आली.
21 दिवसांच्या या योगाभ्यास मालिकेत सोप्या ते अधिक प्रगत पद्धतीने विविध आसनांचा सराव करून नियमित योगाची सवय विकसित करण्यावर भर दिला जाणार आहे. मात्र कोणताही योगाभ्यास करताना आपल्या शारीरिक क्षमतेनुसार आणि आवश्यक असल्यास तज्ज्ञांच्या सल्ल्यानेच सराव करणे महत्त्वाचे आहे.
दररोज नवनवीन योगाभ्यास आणि आरोग्यविषयक माहिती जाणून घेण्यासाठी पाहत राहा आपलं नाशिक.
आपलं नाशिक | आपला आवाज
