नाशिक-पुणे सेमी हायस्पीड रेल्वे मार्गाच्या प्रश्नावरून आज चाकण ते सिन्नर दरम्यान चक्काजाम आंदोलन करण्यात येणार आहे. नारायणगाव परिसरातून जाणारा पूर्वीचा नियोजित रेल्वे मार्ग रद्द करण्यात आल्याने स्थानिक नागरिकांमध्ये नाराजी आहे. हा मार्ग पूर्ववत करावा, या मागणीसाठी आंदोलनाची हाक देण्यात आली आहे.
या आंदोलनात खासदार अमोल कोल्हे, काँग्रेस नेते बाळासाहेब थोरात आणि आमदार सत्यजित तांबे सहभागी होणार आहेत. रेल्वे मार्गाच्या बदलामुळे नारायणगाव परिसरातील नागरिक आणि स्थानिक पदाधिकाऱ्यांकडून तीव्र विरोध व्यक्त करण्यात येत आहे.
चाकण-सिन्नर मार्गावर होणाऱ्या चक्काजाम आंदोलनामुळे या मार्गावरील वाहतुकीवर परिणाम होण्याची शक्यता आहे. त्यामुळे वाहनचालकांनी शक्य असल्यास पर्यायी मार्गांचा वापर करावा, असे आवाहन करण्यात येत आहे.
नाशिक-पुणे सेमी हायस्पीड रेल्वे प्रकल्पासाठी नियोजित मार्गाबाबतचा वाद आता आंदोलनाच्या माध्यमातून अधिक तीव्र झाला असून, प्रशासन या मागणीवर काय भूमिका घेते, याकडे नागरिकांचे लक्ष लागले आहे.
