गंगापूर धरणाच्या पाणलोट क्षेत्रात झालेल्या मुसळधार पावसामुळे गोदावरी नदीला पूर आला असून नाशिक शहरातील साप्ताहिक पाणी कपात रद्द करण्यात आली आहे. गंगापूर धरणातील पाणीसाठा सुमारे ९५ टक्क्यांवर पोहोचल्याने महापौर हिमगौरी आडके यांनी ही घोषणा केली.
मुसळधार पावसामुळे गंगापूर धरणातील पाणीसाठ्यात मोठी वाढ झाली आहे. परिणामी गोदावरी नदीच्या पाणीपातळीत वाढ होऊन नदीला पूर आला आहे. या पार्श्वभूमीवर महापौर हिमगौरी आडके यांनी पूरग्रस्त भागांची पाहणी करून परिस्थितीचा आढावा घेतला.
पाहणीदरम्यान संबंधित विभागांच्या अधिकाऱ्यांसोबत बैठक घेऊन नागरिकांच्या सुरक्षिततेला सर्वोच्च प्राधान्य देण्याचे निर्देश प्रशासनाला देण्यात आले. पूरस्थितीवर सातत्याने लक्ष ठेवण्यासह आवश्यक उपाययोजना तातडीने राबविण्याच्या सूचनाही देण्यात आल्या.
दरम्यान, गंगापूर धरणातील पाणीसाठा सुमारे ९५ टक्क्यांवर पोहोचल्याने शहरात दर शनिवारी होणारी साप्ताहिक पाणी कपात रद्द करण्यात आली आहे. त्यामुळे नाशिककरांना मोठा दिलासा मिळाला आहे.
मात्र, नदीकाठच्या परिसरातील नागरिकांनी कोणत्याही अफवांवर विश्वास ठेवू नये, प्रशासनाच्या सूचनांचे पालन करावे आणि आवश्यक ती खबरदारी घ्यावी, असे आवाहन महापौर हिमगौरी आडके यांनी केले आहे.
