नाशिकच्या शिवाजी रोडवरील नेहरू उद्यानाचा प्रश्न पुन्हा एकदा चर्चेत आला आहे. स्मार्ट सिटी योजनेअंतर्गत सुमारे दोन कोटी रुपये खर्चून उद्यानाचे सुशोभीकरण करण्यात आले. मात्र, काम पूर्ण झाल्यानंतरही हे उद्यान अद्याप नागरिकांसाठी खुले करण्यात आलेले नसल्याने स्थानिकांमध्ये नाराजी व्यक्त होत आहे.
स्थानिक नागरिकांच्या म्हणण्यानुसार, देखभालीअभावी उद्यान परिसराची दुरवस्था झाली आहे. परिसरात नशेखोर आणि मद्यपींचा वावर वाढल्याचा आरोप करण्यात आला असून, उद्यानात मद्याच्या रिकाम्या बाटल्या आढळून येत असल्याचेही नागरिकांचे म्हणणे आहे. तसेच उद्यानातील कारंज्याची अवस्था खराब झाली असून, त्याची नियमित देखभाल होत नसल्याची तक्रार करण्यात आली आहे.
याशिवाय, उद्यानातील चंदनाचे झाड चोरीला गेल्याचाही आरोप नागरिकांनी केला आहे. त्यामुळे सार्वजनिक निधीतून सुशोभीकरणासाठी खर्च करण्यात आलेल्या उद्यानाची योग्य देखभाल आणि सुरक्षा यावरही प्रश्न उपस्थित केले जात आहेत.
या संपूर्ण प्रकरणाची सखोल चौकशी करून उद्यान नागरिकांसाठी तातडीने खुले करावे आणि परिसराची नियमित देखभाल व सुरक्षा व्यवस्था सुनिश्चित करावी, अशी मागणी स्थानिक नागरिकांकडून करण्यात येत आहे.
