चाकू हल्ल्याच्या गुन्ह्यात जामीन मिळाल्यानंतर आरोपीच्या समर्थकांनी मिरवणूक काढून फटाक्यांची आतषबाजी केल्याचा प्रकार भिवंडीत समोर आला आहे. या मिरवणुकीचा व्हिडिओ सोशल मीडियावर व्हायरल झाल्यानंतर भोईवाडा पोलिसांनी आरोपी जितेंद्र पाल आणि त्याच्या ३० ते ३५ समर्थकांविरोधात गुन्हा दाखल केला आहे.
मिळालेल्या माहितीनुसार, २३ ऑक्टोबर रोजी ही मिरवणूक काढण्यात आली होती. जामिनानंतर आरोपीच्या समर्थकांनी दुचाकींवरून मिरवणूक काढत शक्तिप्रदर्शन केल्याचा आरोप आहे. यावेळी फटाक्यांची आतषबाजीही करण्यात आल्याचे समोर आले आहे.
या मिरवणुकीचा व्हिडिओ सोशल मीडियावर प्रसारित झाल्यानंतर पोलिसांनी या प्रकाराची दखल घेतली. त्यानंतर भोईवाडा पोलिसांनी जितेंद्र पाल आणि त्याच्या ३० ते ३५ समर्थकांविरोधात गुन्हा दाखल केला.
या प्रकरणी वरिष्ठ पोलीस निरीक्षक विक्रम मोहिते यांनी माहिती दिली आहे. जामिनानंतर काढण्यात आलेल्या मिरवणुकीचा व्हिडिओ व्हायरल झाल्याने हा प्रकार चर्चेत आला असून, पोलिसांकडून पुढील तपास सुरू आहे.
